Фото: raem.kz
Астанада TESSERA мәдени акселераторы Abu Dhabi Plaza-да өз көрме кеңістігін ашты. Алғашқы «Who Remembers?» көрмесіне Қазақстан, Иран, Беларусь пен Ұлыбританиядан 17 суретші әйел қатысты. Олардың жұмыстары отбасылық әңгімелерде, заттар мен күнделікті әдеттерде сақталған әйелдер жадына арналған.
Не болды
31 қазанда тек шақырылған қонақтар қатысқан жабық ашылу салтанаты өтті. Көрме 1 қарашадан бастап жұмыс істейді, аяқталатын күні көрсетілмеген. Кеңістік Abu Dhabi Plaza-да, Сығанақ көшесінде орналасқан. TESSERA жоспарлары туралы анонсымызда жазғанбыз.
Қатысушылар ашық конкурс арқылы іріктелді, олардың көбі Қазақстанда тұрып, жұмыс істейді. Көрмеге кескіндеме, фотосурет, керамика, киіз, тоқыма және зергерлік өнер туындылары қойылған.
Фото: raem.kz
Мұның мәні неде
Көрме отбасы жадын күнделікті заттардан: кестеден, киімнен, әшекейлер мен сандықта жатқан бұйымдардан іздеуді ұсынады. Басты назарда — әйелдердің кейінгі ұрпаққа үйрететін қимылдары, қолөнер дағдылары мен жоралғылары. Көрме атауы екі сұрақты тоғыстырады: әйел нені есінде сақтайды және оның өзін кім еске алады.
Жанна Асанова Пәкістанның Гилгит-Балтистан аймағындағы бір отбасының әжесі, анасы мен қызы тіккен кестелерден алқа құрастырған. Әшекейдің құрылымы шежіре сызбасын қайталайды, мұнда ол әйелдер желісімен түзілген. Шираздық Газаль Аббаси күйеуі қайтыс болған соң түрлі түсті киім киюді қойған әжесінің көйлегімен өзін суретке түсіреді.
Шакир Шекер Ресей этнографиялық музейінің қорындағы шапанды қайта құрастырады: пішімі мен ою-өрнегі сол қалпы, бірақ мата орнына мөлдір клеенка мен түрлі түсті пакеттер қолданылған. Жұмыс автордың Қазақстанның батысындағы ең үздік жасау шебері болған үлкен әжесіне арналған: отбасында оның бірде-бір бұйымы сақталмаған.
Евгения Казакова әйелдер ән айтып, бірге басқан киіз кілем — сырмақтың архивтік фотосуретін өнеркәсіп өзгерткен Қарағанды даласының бейнесімен ұштастырады.
«Әрқайсымыздың дерлік артында үш әңгіме мен бір фотосуреті қалған әжеміз бар. Бұл көрме әйелдерден әлдеқайда көп нәрсе қалатыны туралы, тек біз оны байқауға дағдыланбағанбыз», — дейді суретші әрі TESSERA құрылтайшыларының бірі Анастасия Жарко.
«Тессера — мозаиканың бір бөлшегі. Мұндағы әр жұмыс бір отбасының тарихын баяндайды, бірақ бәрі бірге ортақ бейнеге айналады. Суретшілер түрлі қалалар мен елдерден келді, ал әйелдер туралы жад бәрінде ұқсас — Шираздан Қарағандыға дейін», — дейді мультидисциплинарлы дизайнер әрі TESSERA құрылтайшыларының бірі Дина Ахильбекова.
Фото: raem.kz
TESSERA неден басталды
Акселераторды Анастасия Жарко мен мультидисциплинарлы дизайнер Дина Ахильбекова құрған. Ол Орталық Азия суретшілеріне жобаларын дамытуға және серіктес табуға көмектесу үшін өнерді, білім беруді, зерттеулер мен халықаралық ынтымақтастықты біріктіреді.
TESSERA-ның көпшілікке ұсынған алғашқы жобасы 2026 жылғы маусымда AQBOZAT OPEN AIR FEST фестиваліндегі арт-павильон болды. Онда Орталық Азия суретшілерінің көрмесі мен ашық шеберлік сабақтары өтті. «Who Remembers?» акселератордың өз кеңістігіндегі алғашқы көрме болды.
Фото: raem.kz
Фото: raem.kz
Фото: raem.kz
