Қазақстанда «Кись-кись, найдись!» әлеуметтік жобасы жоғалған жануарларды іздеуге жеңіл камералар тағылған үй мысықтарын тарта бастады. Бұл тәсіл адамдар бара алмайтын жертөлелерді, шатырлар мен аулааралық қуыстарды жануарлардың өз көзімен көруге бағытталған.
Бұл — 2025 жылы Алматыда Ogency және DADA Agency шығармашылық агенттіктері «Кот и Пёс» қорымен бірлесіп іске қосқан жобаның жаңа кезеңі. Бұған дейін бастама Telegram-бот, жасанды интеллект негізіндегі тану жүйесі және еріктілер желісі арқылы жұмыс істеп келді.
Іздеуге басқа мысықтарды неліктен тартты
Жоғалған жануар тіпті үйінің маңында болса да, қорқыныштан адамдарға жақындамай, жасырынып қалуы жиі кездеседі. Олар көбіне адамның көзі түспейтін және қолы жетпейтін тар жерлерге — гараждардың астына, құбырлардың арасына немесе жертөлелерге паналайды.
Жоба командасы қауіпсіз аулаларда өздігінен серуендеуге үйренген мысықтардың иелерін ынтымақтастыққа тартты. Жануарлардың мойынбауына салмағы бар болғаны 20 грамм болатын кішкентай камера бекітіледі. Мысық өзінің күнделікті ауласын аралаған кезде, бейнежазба басқа жануарлар жасырынуы мүмкін жерлерді автоматты түрде таспаға түсіріп алады.
Жоба авторлары камера таққан мысықтарды арнайы іздеуге мәжбүрлемейтінін ерекше атап өтеді. Бұл ретте басты назар жануардың қауіпсіздігіне аударылады: жеңіл мойынбаулар бұтақтарға немесе қоршауларға ілінген жағдайда өздігінен ашылатындай етіп жасалған.
Камерасыз да көмектесуге болады
Көмекке қатысу үшін көшеде кездескен мысықты суретке түсіріп, оны Telegram-ботқа жіберу жеткілікті. Бот жасанды интеллект көмегімен суретті өңдейді: түсін, жолақтарын және сыртқы ерекшеліктерін иелері іздеуге берген өтінімдердегі фотосуреттермен автоматты түрде салыстырады.
Жоба Алматыда басталған болатын, ал қазір оның жасаушыларының айтуынша, бүкіл Қазақстан бойынша қолжетімді. Осы уақыт ішінде жүйеге жүздеген сауалдар келіп түсіп, олардың бір бөлігі үй жануарларын өз иелеріне қайтаруға нақты көмектесті.
Камера таққан мысықтар жүйеге түсетін бақылаулардың ауқымын кеңейтеді. Бірақ іздеудің негізгі күші бұрынғысынша қарапайым тұрғындардың бейжай қарамауы мен белсенді қатысуына сүйенеді: әрбір жіберілген фотосурет үй жануарының табылу мүмкіндігін арттырады.
