Фото: Aibek Skakov / Pexels
Астанада заңсыз Nomadgames және Sultangames интернет-казинолары мен олардың айна-сайттарының жұмысын қамтамасыз еткен адамдар тобына қатысты тергеу аяқталды. Қылмыстық іс сотқа жолданды. Бұл туралы Қаржылық мониторинг агенттігіне сілтеме жасап Informburo.kz хабарлады.
ҚМА мәліметінше, ойыншылардан қаражат қабылдау үшін төлем ұйымдары, банктік эквайринг, POS-терминалдар мен интернет-терминалдар, электрондық әмияндар және криптовалюталық құралдар пайдаланылған.
Төлемдерді заңды қызмет ретінде көрсеткен
Агенттіктің хабарлауынша, схемаға банк секторының өкілдері қатысқан. Олар төлем инфрақұрылымын қосуды, міндетті тексерусіз шарттар жасасуды және интернет-терминалдарға тиісті MCC-кодтарды беруді қамтамасыз еткен. Операциялардың нақты мақсатын жасыру үшін төлемдер заңды букмекерлік және өзге де шаруашылық қызмет ретінде көрсетілген.
Электрондық терминалдар арқылы жүргізілген операциялардың жалпы сомасы 188 млрд теңгеден асқан.
Тергеу нұсқасы бойынша қаражат криптовалютаға айырбасталған
Тергеу нұсқасы бойынша, схемаға қатысушылар кірісті заңдастыру үшін өздері бақылайтын ЖШС-ні пайдаланған. Оның шоттарына жалған шарт бойынша 10 млрд теңге түскен. Кейін қаражат криптовалютаға айырбасталып, күдіктілердің әмияндарына аударылған.
Тергеушілер жалпы сомасы 19 млн USDT болатын цифрлық активтердің қозғалысын анықтаған. USDT — құны АҚШ долларына байланған криптовалюта.
Мүлікке тыйым салынып, іс сотқа жіберілді
Сот санкциясымен үш пәтерге, алты автокөлікке, сондай-ақ сомасы 1,4 млрд теңге болатын криптоактивтер мен банк шоттарындағы ақшаға тыйым салынған.
Үш күдікті қамауға алынған, тағы үшеуіне кепіл түріндегі бұлтартпау шарасы тағайындалған. Екі күдікті ешқайда кетпеу және тиісті мінез-құлық туралы қолхат берген.
