Иллюстрация: ЖИ
9 қарашада AFSA тізілімінде Payward KZ Ltd. компаниясы пайда болды. Оның акционері Kraken криптобиржасының бас компаниясы Payward, Inc. екені көрсетілген. Kraken Қазақстан нарығына «Астана» халықаралық қаржы орталығы (АХҚО) арқылы шығуға дайындалып жатыр (t.me).
Не белгілі
22 қазанда Kraken АХҚО-ның қаржылық қызметтерді реттеушісі AFSA-ның алдын ала мақұлдауын алды. Енді топтың Қазақстандағы қызметі жергілікті Payward KZ Ltd. компаниясы арқылы ресімделді. Kraken қазақстандық клиенттерге өз биржасының жаһандық өтімділігіне қол жеткізуге мүмкіндік беруді жоспарлап отыр.
Алдын ала мақұлдау әлі лицензия емес. Компанияның тіркелуі биржа Қазақстанда жұмыс істеп жатыр дегенді білдірмейді. Kraken іске қосылғанын жариялаған жоқ.
АХҚО-да тағы кім бар
Binance пен Bybit AFSA-ның толық лицензияларын алған. АХҚО-да Bitfinex Securities те жұмыс істейді. Bitfinex-тің бұл бөлімшесі токенделген бағалы қағаздар, яғни цифрлық токен түріндегі бағалы қағаздар шығарады.
AFSA АХҚО құқығы бойынша жұмыс істейтін компанияларға лицензия беріп, олардың қызметін қадағалайды. Реттеушінің мәліметінше, тағы жеті платформа цифрлық активтер саудасы алаңдарын басқаруға лицензия алуға ниетті екенін мәлімдеген.
Қазақстанның заңды криптонарығы қалай жұмыс істейтіні және инвесторлар қандай салық төлейтіні туралы АХҚО биржаларына арналған талдауымыздан оқыңыз.
