Иллюстрация: ЖИ
Мөлдір Рысалиева inDrive-тың Қазақстандағы бизнесінің басшысы болып тағайындалды. Бұл туралы компания 9 қарашада хабарлады (indrive.com). Ол сервис сапасына, пайдаланушылардың қауіпсіздігіне және суперқосымшаны дамытуға жауап береді. Елдегі бизнесті 2024 жылдан бері басқарған Арай Бекембаев компанияның негізін қалаушы Арсен Томскийдің жетекшілігімен жаһандық жобаларға ауысады.
Не болды
inDrive-қа келгенге дейін Рысалиева Halyk Bank-тің еншілес ұйымы Halyk Finservice-ті басқарған. Онда маркетплейсті дамыту стратегиясымен және логистикалық инфрақұрылымды іске қосумен айналысқан. Бұған дейін Қазақстандағы Ozon мен Lamoda-ны басқарып, бизнесті дамытуға және жұмысын жақсартуға жауап берген.
Рысалиеваның электронды сауда, стратегиялық басқару және бизнесті кеңейту салаларында 10 жылдан астам тәжірибесі бар. Енді ол елдегі inDrive бизнесінің барлық негізгі бағытын басқарады. Мемлекеттік органдармен жұмыс істеу де оның міндетіне кіреді.
Бұл нені білдіреді
Жаңа басшының міндеттерінің бірі — inDrive-ты суперқосымша ретінде дамыту. Бірнеше қызметті біріктіретін қосымшаны осылай атайды: мысалы, көлікпен жүру, курьерлік жеткізу және дайын тағамға тапсырыс беру. Компания Қазақстанда осы бағыттарды дамытып келеді.
Мұнда бір маңызды жайт бар: Рысалиеваның маркетплейстерді басқару және логистиканы іске қосу тәжірибесі бар. Жаңа қызметінде ол осы тәжірибесін жолаушылар мен жеткізуге тапсырыс берушілер пайдаланатын қалалық сервистерге қолданады.
«Бұған дейінгі тәжірибем ірі маркетплейстерді дамытумен, жұмыс ауқымын кеңейтумен және клиенттерге қызмет көрсету сапасын жақсартумен байланысты», — деді Рысалиева. Оның айтуынша, inDrive-та командамен бірге сервистерді дамытып, Қазақстандағы пайдаланушыларға оларды қолдануды қолайлы ете түсуге ниетті.
Арай Бекембаев немен айналысады
Бекембаев Арсен Томский тікелей жетекшілік ететін Discovery бөлімшесіне ауысады. Ол inDrive жұмыс істейтін елдердің көбінде іске қосуға болатын жаңа жаһандық жобалармен айналысады. Қазір платформа 47 елдің 1200-ден астам қаласында жұмыс істейді.
Бекембаев компанияға 2020 жылы ТМД елдерінде бизнесті дамыту маманы болып қосылды. Төрт жылдан кейін Қазақстандағы бағытты басқарды. «Алты жыл бұрын мен inDrive-қа Қазақстандағы алғашқы қызметкері болып келдім», — деді ол.
Компания 2014 жылдан бері Қазақстанда жұмыс істейді. Мұнда қала ішіндегі сапарлардан бөлек, қалааралық тасымалды, азық-түлік пен дайын тағам жеткізуді, курьерлік қызметтерді және бизнеске арналған жеткізуді дамытып келеді. Елде inDrive-тың мыңнан астам адам жұмыс істейтін ірі өңірлік хабы да орналасқан.
