Иллюстрация: ЖИ
Қазақстанда үш жылда 99 микроқаржы ұйымы (МҚҰ) мен 13 кредиттік серіктестік лицензиясынан айырылды. Лицензияның күші жойылғанымен, клиенттердің қарызы өздігінен есептен шығарылмайды, деп хабарлайды LS Қаржы нарығын реттеу және дамыту агенттігіне сілтеме жасап (lsm.kz).
Не болды
40-қа жуық жағдайда лицензия мәжбүрлі түрде қайтарып алынған. Реттеуші бұған заңнаманы жүйелі түрде бұзу, нұсқамаларды орындамау және лицензия алғаннан кейін жұмыс істемеу себеп болғанын айтты.
Заңнаманы жүйелі түрде бұзғаны үшін 16 МҚҰ мен бес кредиттік серіктестік лицензиясынан айырылды. Бұл қатарынан 12 күнтізбелік ай ішінде үш немесе одан да көп рет заң бұзу дегенді білдіреді.
Тағы төрт МҚҰ мен екі кредиттік серіктестік реттеушінің жазбаша нұсқамаларын бірнеше рет орындамаған. Он МҚҰ мен екі серіктестік лицензия алғаннан кейін алты ай бойы жұмыс істемегені үшін лицензиясынан айырылған.
Қарыз алушылар үшін бұл нені білдіреді
Мұнда бір маңызды жайт бар: МҚҰ лицензиясынан айырылса да, клиент міндеттемелерінен босатылмайды. Қарыз басқа ұйымға берілуі мүмкін.
«Қарыз алушылардың міндеттемелері сақталады», — деп хабарлады агенттік.
МҚҰ қайта ұйымдастырылғанда, микрокредитті қайтаруды талап ету құқығы оның құқықтық мирасқорына өтуі мүмкін. Тағы бір жолы — қарызды талап ету құқығын жаңа кредиторға беру. Мұндай талаптарды заңда көзделген санаттарға кіретін ұйымдарға ғана беруге болады.
Жаңа кредитор туралы қалай хабарлайды
Реттеуші қарызды қабылдай алатын ұйымдар қатарында екінші деңгейлі банктерді, коллекторлық агенттіктерді, басқа МҚҰ мен арнайы қаржы компанияларын атады.
МҚҰ талап ету құқығын басқаға берсе, шарт жасалғаннан кейін 30 күнтізбелік күн ішінде қарыз алушыға хабарлауға міндетті. Хабарламада жаңа кредитор немесе сервистік компания және алдағы төлемдерге арналған деректемелер көрсетілуі керек.
Сондай-ақ клиентке берілген құқықтардың көлемі мен берешектің құрамы туралы хабарлауы керек. Негізгі қарыз, сыйақы, комиссиялар мен тұрақсыздық айыбы бөлек көрсетіледі. Бұл мәліметтер қарызды беру туралы хабарламада болуы тиіс.
