Иллюстрация: ЖИ
Алматыда Қазақстандағы 3D-технологияларды қолданып, әр адамға жеке ортез жасайтын алғашқы мемлекеттік зертхана ашылды. Жоба аясында медициналық көрсетілімдері бар балаларға ортездер тегін жасалады, деп хабарлайды Еңбек министрлігінің enbekgovkz телеграм-арнасы (t.me). Ортездер дененің жекелеген бөліктерін сүйемелдеп, бекітіп тұрады, олардың қалпын түзетуге және қажетті қимылдарды жасауға көмектеседі.
Не болды
Зертхана Қазақстанның Еңбек және халықты әлеуметтік қорғау министрлігіне қарасты Әлеуметтік қорғау саласын дамыту ұлттық ғылыми орталығының базасында құрылды. Онда балалар мен ересектерге жеке қажеттіліктеріне сай протездік-ортопедиялық көмек көрсетіледі. Бұл орталық оңалтуға арналған заманауи техникалық құралдардың қолжетімділігін арттыруға тиіс.
Ашылу кезінде қонақтарға ортез жасаудың барлық кезеңі көрсетілді: пациентті тексеріп, денесін цифрлық сканерлеуден бастап, бұйымды жасап, кигізіп көруге дейін. Іс-шараға еңбек және халықты әлеуметтік қорғау министрі Асқарбек Ертаев, Алматы мәслихатының депутаттары, қоғамдық ұйымдардың өкілдері мен оңалту мамандары қатысты.
Бұл пациенттер үшін нені білдіреді
Тірек-қимыл аппараты бұзылған балаларды ерте жастан ортезбен қамтамасыз ету негізгі бағыт болмақ. Ортезді әр балаға жеке жасау оның анатомиялық ерекшеліктері мен оңалту қажеттіліктерін ескеруге мүмкіндік береді. Ортездің қажеттілігін, құрылымын және оны қолдану тәртібін бейінді мамандар денсаулық жағдайы мен медициналық көрсетілімдерді ескере отырып анықтайды.
Бұйым дайын болған соң мамандар оны пациентке кигізіп көреді, дене өлшемдеріне сәйкестігін тексеріп, қажет жерін шақтайды. Содан кейін адамға ортезді пайдалану ережелерін үйретеді. Пациенттермен жұмыс аясында оңалту кезінде де қолдау көрсетіледі.
3D-технологиялар қалай қолданылады
Тексеруден кейін мамандар дененің қажетті бөлігін сканерлеп, цифрлық моделін алады. Соның негізінде арнайы бағдарламада пациентке арналған ортездің құрылымын жобалайды. Одан кейін модель өндіріске жіберіліп, бұйым заманауи жабдықпен жасалады.
Цифрлық тәсіл әр пациенттің дене ерекшеліктерін ескеруге және жобалау дәлдігін арттыруға көмектеседі. Қажет болса, деректерді кейін ортездің құрылымын өзгерту немесе бұйымды қайта жасау үшін сақтауға болады.
Зертхана тағы немен айналысады
«Біз үшін заманауи технологиялардың адамға тікелей көмектесуі маңызды», — деді Асқарбек Ертаев ашылу кезінде.
Министрдің айтуынша, зертхана жаңа шешімдер әзірлеп, олардың тиімділігін зерттейтін ғылыми-практикалық алаңға да айналады. Оның құрылуы Қазақстанның 2025–2030 жылдарға арналған инклюзивті саясат тұжырымдамасының міндеттерімен байланысты.
