Денсаулық сақтау министрлігі, егер ол балаларға бағытталған болса, фастфуд, тәтті сусындар мен құрамында қант, тұз және қаныққан майлар көп тағамдардың жарнамасын шектеу туралы заңнамалық ұсыныстар әзірледі. Бұл туралы аппараттық кеңесте ҚР ДСМ Медициналық көмекті ұйымдастыру департаментінің директоры Гүлнар Сәрсембаева мәлімдеді.
Оның айтуынша, ведомство мұндай өнімдердің жарнамасын теле- және радиоарналарда, әлеуметтік желілерде және сыртқы жарнама құралдарында шектеуді ұсынады. Қазіргі уақытта министрлік осы шектеулердің реттеушілік әсеріне талдау дайындап жатыр — бұл заңнамаға түзетулер енгізу алдындағы міндетті қадам.
Бастамаға Президенттің үкіметке фастфуд жарнамасы мәселесін шешу жөніндегі тапсырмасы түрткі болды. Ол мұндай жарнаманың тұрақты зиянды әдеттерді қалыптастыратынын, денсаулық сақтау жүйесіне түсетін жүктемені арттыратынын және елдің еңбек әлеуетін төмендететінін атап өткен еді.
Балалар мен жасөспірімдер жарнаманы ересектерге қарағанда тезірек қабылдайды: жарқын қаптама, әлеуметтік желілер мен блогерлер арқылы ілгерілету оларға күштірек әсер етеді. Денсаулық сақтау министрлігі мынадай цифрларды келтіреді — 6–9 жас аралығындағы балалардың 23%-ында артық дене салмағы бар, 6%-ы семіздікке шалдыққан, ал жасөспірімдердің 17,5%-ы апта сайын энергетикалық сусындар ішеді.
Ұсыныстар Дүниежүзілік денсаулық сақтау ұйымының ұсынымдары мен халықаралық тәжірибені ескере отырып дайындалды.
Қазақстанда дұрыс тамақтану бойынша шаралардың бір бөлігі қазірдің өзінде қолданыста. Энергетикалық сусындар 21 жасқа толмаған адамдарға сатылмайды. 2025 жылдың қыркүйегінен бастап білім беру ұйымдарында жаңа Тамақтану стандарты қолданысқа енгізілді — ол рациондағы қант пен тұздың үлесін азайтады және көкөністердің, жемістер мен сүт өнімдерінің үлесін арттырады. Өңірлерге балалармен және ата-аналармен профилактикалық жұмысты күшейту тапсырылды.
Министрлікте шектеулер нақты өнімдерге тыйым салуға емес, өнімді балалар арасында ілгерілетуге қатысты екенін атап көрсетеді.
Дереккөз: Қазақстан Республикасы Денсаулық сақтау министрлігінің баспасөз қызметі
Тақырып бойынша оқыңыздар:
- Мәдиев ЖИ министрі болып қалды, ҰҚК операторларға қойылатын талаптарды өзгертуде, Тоқаев Қытайға басымдық беруде: 5 қыркүйектегі басты жаңалықтар
- Тоқаевтың Оңтүстік Кореяға сапарының қорытындысы: $19,19 млрд-қа 82 құжат
- Kaspi суперкомпьютер қуатының 70%-ын сатып алды. Компанияға мұнша ЖИ не үшін қажет?
