Фото: photohana namvariii / Pexels
Қазақстанда inDrive сұраныс шарықтаған күндері фототексеруді айналып өтпек болған 1300-ден астам жүргізушіні бұғаттады. inDrive сервисінің мәліметінше, негізгі қалаларда селфи мен көліктің фотосын екі есе жиі сұрататын болған. Бұл тексерулер жолаушыны алып кетуге аккаунтта көрсетілген жүргізуші мен көліктің келгенін растауға көмектеседі (indrive.com).
Не болды
Сұраныс өскен тұста компания мыңдаған жаңа жүргізушіні қосып, құжат тексеретін қызметкерлер санын екі есе арттырды. Жүргізушілер жұмысқа кіріспес бұрын көлігін міндетті тексеруден өткізеді. Сондай-ақ сервис жеке куәліктегі фотосуретті профильдегі суретпен салыстырады.
Бұған қоса, inDrive фототексеруді күшейтті. Сервис сұратқан кезде жүргізуші сол сәтте тікелей қолданбада селфи жасап, көлігін фотоға түсіруі керек. Содан кейін суреттер тексеруге жіберіледі.
Сурет сұрату жиілігі жүргізушілердің әр тобы үшін әртүрлі, олардың арасында жаңадан қосылғандар да, тексеруден өтіп қойғандар да бар. Шағым түскеннен кейін жүргізуші шұғыл қосымша тексеруге жіберіледі. Фототексерулердің 98%-ын жасанды интеллект өңдейді, ал барлық даулы жағдайды операторлар қарайды.
Бұл нені білдіреді
Фототексеру тапсырысты басқа адам орындаған немесе жолаушыны алып кетуге аккаунтқа тіркелмеген көлік келген жағдайларды анықтауға көмектеседі. Компания бұл тексеруді айналып өту әрекеттері үшін бұғаттауларды сұраныс артқан кезеңмен байланыстырды.
«2026 жылдың тоғыз айында Қазақстанда жүргізушінің немесе көліктің сәйкес келмеуіне қатысты шағым түскен сапарлар саны өткен жылдың сәйкес кезеңімен салыстырғанда 15%-дан астам азайды», — деп хабарлады inDrive баспасөз қызметі.
Компанияның мәліметінше, осы кезеңде сапарлардың жалпы саны өскен. Азайғаны — дәл жүргізушінің немесе көліктің сәйкес келмеуіне қатысты шағымдар.
Фотосуреттерді тексеруден бөлек, inDrive қолданбасында бағытты бақылау жүйесі жұмыс істейді. Жасанды интеллектке негізделген жүйе бағыттан әдеттен тыс ауытқуларды байқап, қосымша тексеруді іске қоса алады. Жолаушылар мен жүргізушілер қолдау қызметіне жүгіне алады, SOS түймесін басып, бағытын жақындарымен бөлісе алады.
Жазда «Қауіпсіздік орталығында» жолаушылар мен жүргізушілерге сапардың аудиожазбасын жасау мүмкіндігі қосылды. Компанияның хабарлауынша, жазбалар шифрланған күйде сақталады. Қызметкерлер оларды пайдаланушы өтініш білдіргенде ғана тыңдай алады — бұл сапардан кейінгі даулы жағдайларды шешуге көмектеседі.
