Иллюстрация: ЖИ
Қазақстанда inDrive қосымшасындағы жарнама шығынының 60%-дан астамы банктер мен финтех компанияларына тиесілі, деп хабарлады компания (indrive.com). Жарнама бағыты жұмыс істеген алғашқы жылы ай сайын жарнама орналастыратындардың саны 3,6 есе өсті. Сервис дерегінше, Қазақстан оның жарнама берушілері арасында қаржы секторының үлесі жоғары болуымен ерекшеленеді.
Не болды
Осы кезеңде банктердің, финтех компаниялары мен төлем сервистерінің жарнама шығынындағы үлесі екі есе артты. Барлық көрсеткіш inDrive сервисінің қосымшасындағы жарнамаға қатысты.
Компания дерегінше, өзге нарықтарда жарнама берушілер түрлі саланы қамтиды. Олардың арасында мейрамхана желілері, күнделікті тұтыну тауарларын өндірушілер, байланыс операторлары мен автокөлік брендтері бар.
Дүниежүзі бойынша қосымшада ай сайын 2 000-нан астам жарнама беруші жарнама орналастырады. Компания брендтермен тікелей және жарнама холдингтері арқылы жұмыс істейді. Жарнаманы автоматты түрде орналастыратын алаңдар — жарнама биржалары арқылы да сатып алуға болады.
Бұл пайдаланушылар үшін нені білдіреді
Жарнама күту кезінде де көрсетіледі: жолаушыға көлік келе жатқанда, жүргізушіге келесі тапсырыс түскенге дейін шығады. inDrive бұл форматты Ride Media деп атайды және оны адамның жолда көретін сыртқы жарнамасымен салыстырады.
Алғашқы жылы жарнама бағыты оннан астам ірі жаңарту шығарды. Қосымшада жарнаманың жаңа форматтары пайда болып, олардың жүктелу уақыты қысқарды. Жолаушылар дербес деректерін пайдалану баптауларын өздері басқара алатын болды.
«Бұл ретте жарнаманың қосымшаны пайдалану барысына үйлесіп, пайдаланушыларға кедергі келтірмеуі біз үшін маңызды», — деді inDrive.Ads директоры Макс Силин.
Жарнама бағыты қалай өсті
inDrive компаниясы inDrive.Ads қызметін 2025 жылғы шілдеде іске қосты. Алғашқы жылы жарнама 25 елде қолжетімді болып, көрсетілім саны 2 млрд-тан асты.
Сервис жарнама орындарының бір бөлігін өзінің әлеуметтік жобаларына бөледі. 2026 жылдың бірінші жартыжылдығында бұл жобалар 1,7 млн-нан астам көрсетілім жинады. Олардың арасында Қазақстандағы Арсен Томскийдің inVision U білім беру бастамасы бар.
Силин келесі кезеңде retail media экожүйесін құрып, халықаралық және жергілікті брендтермен ынтымақтастықты кеңейтуді көздейтінін айтты.
